Dakilang Kapistahan ng Banal na Isantatlo

Iisang Diyos sa Tatlong Persona
 
Dakilang Kapistahan ng Banal na Isantatlo, sanggayong B, Ika-3 ng Junyo 2012, Mt. 28, 16 - 20

Sa Deuteronomio, nakikita natin ang kapangyarihan ng Diyos bilang tagapaglikha ng langit at lupa at tinatawag tayong lahat na sundin ang kanyang mga utos upang ang umunlad ang ating buhay at gayun din ng ating mga anak, sapagkat pagpapalain tayo ng Panginoon.

   Sa sulat ni San Pablo sa mga taga-Roma, “Kung sino ang kinasihan ng Espiritu ay anak ng Diyos.”  Sa pamamagitan nito, tinatawag natin ang Diyos bilang “Abba” o “Ama.”

   Sa Mabuting Balita ayon kay Mateo, binigay kay Hesukristo ang lahat ng kapangyarihan at inaatasan tayong ipangalat natin ang Mabuting Balita at gawing disipulo ang lahat ng mga bansa.

   Nababanaag sa buong bibliya ang pagka-Diyos ng Panginoon – iisang Diyos sa tatlong Persona, magkatulad sa karangalan, ngunit may katangi-tanging Pagka-Diyos.  Ang Ama ang lumikha at patuloy na lumilikha ng langit at lupa.  Sa Anak binigay ang lahat ng kapangyarihan ng langit at lupa, magtali at magkalag, at maging tagapagligtas ng buong mundo.  Sa Espiritu Santo, ang bawat tao ay tunay na nagiging anak ng Diyos sapagkat sa kanilang buhay, nababanaag ang mismong presensya ng Panginoon.

   Ipagsama ang lahat ng ito at tayo’y nagiging isa tulad ng Diyos bilang iisa.  Ngunit tulad din ng pagkakaiba ng kanyang Persona, tayo rin ay may kani-kaniyang gampanin upang ang katawan ni Kristo ay maging buhay.  Nawa’y ilarawan natin ang pagmamahal ng Diyos Ama, Anak, at Espiritu Santo sa ating buhay!   (Fr. Lito Jopson)