Bakit kaunti ang mga manggagawa ng Panginoon?

Ika-14 linggo ng pangkaraniwang panahon, sanggayong panahon C, Ebanghelyo: Lukas 10: 1-12, 17-20


Ang mga katagang "Puno ang ani" ay nagsasaad na sa pagdating ng panahon, walang-kaduda-kaduda ang pagiging mabunga ng lahat ng pinaghirapan ng Panginoong Hesukristo - ang kaligtasang laan niya para sa atin.
   Ngunit bakit kaunti ang mga manggagawa?  Hindi ba sila naaakit sa dami ng bunga?  Pinakikita ng Ebanghelyong ito ang mga dahilan ng bakit kaunti ang mga manggagawa at kung paano pa ito dadami kasama ng dami ng ani. Ang una'y masyadong nalulong na ang tao sa mga alalahanin ng mundo at hindi ang kaligtasan ng Diyos.
    Ikalawa, hindi siya tumutulong sa pagpapalaganap ng kapayapaan sa mundo.  Hindi mapayapa ang mundo dahil ang tao'y hirap, gutom, walang trabaho, may sakit, at biktima ng inhustisya.  Kung hindi lang gahaman ang tao sa kanyang sarili, mas may panahon siyang tumulong sa kanyang kapwa sa pagbibigay ng pagkain, trabaho, at buhay.
   Ikatlo, hindi kaharian ang Diyos ang ipinamamalas niya sa kanyang kapwa't mga anak.  Wala siyang oras sa pagiging aktibo sa Simbahan na sana aktibong instrumento ng pagbabago sa daigdig at daan tungo sa pagbubuo ng kaharian ng Diyos dito sa lupa.  May ani ang Panginoon, ngunit hindi tayo kasama bilang kanyang mga manggagawa.
   Isipin natin ang kaligtasan ng tao sa simula pa; magdulot tayo ng tatagal na kapayapaan sa mundo, at aktibo tayong lumahok upang mamalas ang kaharian ng Diyos.  Dadami ang mga manggagawa kalakip ng ani ng Panginoon.