Santo Nino, simbolo ng kababaang loob

Kapistahan ng Santo Nino
Ebanghelyo: LUKAS 2, 41 - 52
siglo C

Sa dakilang kapistahan ng Santo Nino, pinaalahanan tayong palalalimin ang ating pananampalataya upang hindi magmistulang anting-anting ang Santo Nino; bagkus, taglayin natin ang diwa ng batang si Kristo at isabuhay ang mensahe ng kapistahang ito sa Pilipinas.

Una, ang pagiging bata ni Hesus ay tungkol sa kababaang loob at sa pagtalima sa kalooban ng Ama. Ito'y alang-alang sa atin na nais niyang hilumin ang ating kaugnayan sa Diyos Ama. Hindi ito batay sa kapangyarihan o kayamanan kundi sa kawalan ng lakas tulad ng isang bata.

Ikalawa, ang pagiging sanggol ni Kristo ay nagpapamalas ng kaluwalhatian ng Diyos. Tulad ni San Pablo, "Pinagmamalaki ko ang aking kahinaan". Ang Diyos ang kanyang tanging lakas. Kahit gaano pa ang ating kayamanan sa mundo, wala ito kung ikukumpara sa Diyos bilang ating tunay na yaman.

Ikatlo, tulad ni Hesus na lumaki na taglay ang karunungan, pangagatawan, at pagbibigay lugod sa Diyos, sikapin natin na palalimin ang ating pananampalataya at dalhin ang ating kapwa sa liwanag, katotohanan, at buhay. Ang pagkabata ni Kristo ay hindi hiwalay sa kanyang krus sa kanyang paglaki. Nawa'y matagpuan din natin ang paglalamin ng ating pananampalataya sa pag-alay ng ating buhay sa Diyos at sa kapwa.